Lappol siinnaaɓe Chang'e 4 to Lewru

Ñalnde 03 siilo 2019, lappol siinnaaɓe e baagal maɓɓe Chang'e 4 jippii e dow wertaango Lewru, hay ɗum ne ko e bannge duŋkitiiɗo en o, ko meeɗaa waɗde, baagal ngal jippii ko e bannge worgo Lewru e nder wiiduru walla asɓalde Won Karman, natirka maggal ina ɓami jeeɓol nokkuure ɗo ngal telli ɗo. Caggal ƴeewndale mbela kaɓirɗe baagal ngal ina ngolla no haanirta ni, e ƴeewtaade mbela jokkondiral hakkunde maggal e toppitiiɓe ngal to Siin ɓe ina yuɓɓi, deegowal Yutu-2 (Wojere kaaƴe e sinwaare) woppi laana tellinnooka ngal ka yaaɓani leydi Lewru, ɗuum waɗi ko jamɗe 12 caggal nde ngal juuri e Lewru. Natirɗe deenɗe golle ɗe ɓami nate lappi biife baagal deegowal ngal e dow nduf-ndufoldi Lewru, ɗeen nate lottaa to beeyweeyngal Keekiyaawu (Queqiao), ngaal ne lotti ɗe to leydi, Deegowal ngal kiloogaramuuji 140 ɗaanna gila ndeen (03 siilo), ko e 10 siilo ngal fin'dina, waɗi noon ko ɓuuɓol mawngol woni toon, ndeen ngal fini, ngal adii fo ko ɓamde natal laana njolnunooka ngal ka. Laana ka looci tati juutɗi (5m) ballitoodi e jokkondiral, yanti a ka jogii mbiɗtirka ɓakdi, kaan maa wallu en anndude ko leydi Lewru soomi e geɗe. Ɗee balɗe noon maa ɓuuɓol ɓeydo e ɗo deegowal ngal e laana maggal woni ɗo, sabu ko e jammaagu ngu balɗe 14 faya, kono kaɓirɗe gollirɗe seese ina e majje.

Kuɗol: Hammadi Jah

Ñalnde: 12-01-2019